రోడ్డు ప్రమాదాల నివారణకు ప్రభుత్వం ఎన్ని చర్యలు తీసుకుంటున్నా యాక్సిడెంట్లు జరుగుతూనే ఉన్నాయి. కొందరు నిర్లక్ష్యంగా డ్రైవింగ్ చేయటం, ట్రాఫిక్ ఉల్లంఘనలకు పాల్పడుతుండటంతో ఈ ప్రమాదాలు చోటు చేసుకుంటున్నాయి. ఈ నేపథ్యంలో ట్రాఫిక్ రూల్స్ అతిక్రమించేవారి పట్ల కఠినంగా వ్యవహరించాలని రేవంత్ సర్కార్ డిసైడ్ అయింది. ట్రాఫిక్ నిబంధనలు పదే పదే ఉల్లంఘించే వారి డ్రైవింగ్ లైసెన్సులు శాశ్వతంగా రద్దు చేయాలని యోచిస్తోంది. ఈ మేరకు అసెంబ్లీలో రవాణాశాఖ మంత్రి పొన్నం ప్రభాకర్ కీలక ప్రకటన చేశారు. టాఫ్రిక్ రూల్స్ ఐదారు సార్లకు పైగా అతిక్రమించే వారి లైసెన్స్‌లు శాశ్వతంగా రద్దు చేయటంతో పాటుగా.. అలాంటి వారి వాహనాలు కూడా రిజిస్ట్రేషన్ చేయబోమని చెప్పారు. ఆర్టీసీ కార్మికుల విలీనం, ఆటో డ్రైవర్ల సంక్షేమం గురించి కూడా ఆయన మాట్లాడారు. అసెంబ్లీలో పలువురు సభ్యులు అడిగిన ప్రశ్నలకు జవాబిచ్చారు.
ఆర్టీసీ కార్మికుల విలీన ప్రక్రియ ఎప్పుడు పూర్తవుతుందని బీజేపీ శాసనసభా పక్ష నేత ఏలేటి మహేశ్వర్‌రెడ్డి మంత్రిని ప్రశ్నించారు. ఓవర్ టైమ్ చేసిన కార్మికులకు డబ్బులు ఇస్తే సమస్య తీరదని, దీనివల్ల డ్రైవర్లకు నిద్రలేక ప్రమాదాలు జరుగుతాయని అన్నారు. కొత్త నియామకాలు చేపట్టాలని మహేశ్వర్ రెడ్డి డిమాండ్ చేశారు. సీపీఐ సభ్యుడు కూనంనేని సాంబశివరావు మాట్లాడుతూ.. ఆటో డ్రైవర్ల కోసం సంక్షేమ బోర్డు ఏర్పాటు చేయాలన్నారు. స్పందించిన మంత్రి పొన్నం.. ఆర్టీసీ విలీన అంశంపై కమిటీ వేశామని, భవిష్యత్తు కార్యాచరణ ప్రకటిస్తామని చెప్పారు. ఆటో డ్రైవర్ల కోసం సంక్షేమ బోర్డును కూడా ఏర్పాటు చేస్తామని ఆయన హామీ ఇచ్చారు.
