‘సాక్షి’ పత్రికవారే ప్రెస్‌మీట్లు ఏర్పాటు చేసేవారని, అందులో ఏం మాట్లాడాలో సబ్జెక్టు వారే చెప్పేవారని సినీ నటుడు, వైకాపా నాయకుడు పోసాని కృష్ణమురళి మంగళవారం సీఐడీ పోలీసుల విచారణలో చెప్పారు. అవి నిజాలో కాదో తాను నిర్ధారించుకోలేదని చెప్పినట్టు తెలిసింది. చంద్రబాబు, పవన్‌కల్యాణ్, లోకేశ్‌ తదితరులపై సామాజిక మాధ్యమాల్లో అనుచిత వ్యాఖ్యలు చేయడంతోపాటు మార్ఫింగ్‌ ఫొటోలు, వీడియోలు ప్రదర్శించిన పోసానిపై చర్యలు తీసుకోవాలంటూ తెలుగు యువత రాష్ట్ర అధికార ప్రతినిధి బండారు వంశీకృష్ణ గతేడాది అక్టోబరు 9న సీఐడీ పోలీసులకు ఫిర్యాదు చేశారు. ఈ కేసులో కోర్టు ఆదేశాల మేరకు సీఐడీ పోలీసులు ఆయన్ను గుంటూరు ప్రాంతీయ కార్యాలయంలో మంగళవారం ఉదయం 11 గంటల నుంచి సాయంత్రం వరకు విచారించారు. డీఎస్పీ లక్ష్మయ్య తదితరులు 32 ప్రశ్నలు అడగ్గా కొన్నింటికి స్పష్టమైన సమాధానాలిచ్చిన పోసాని.. మరికొన్ని ప్రశ్నలకు తెలియదని, గుర్తు లేదని మొక్కుబడిగా స్పందించారని సమాచారం. పోసానితో ఫొటోలు దిగడానికి సీఐడీ పోలీసులు ఆసక్తి చూపించడం సామాజిక మాధ్యమాల్లో వైరల్‌గా మారింది. విశ్వసనీయ సమాచారం ప్రకారం పోలీసుల ప్రశ్నలు, పోసాని సమాధానాలు.
పోలీసులు: ప్రెస్‌మీట్‌ పెట్టాలని మీకు ఎవరు చెప్పేవారు? సబ్జెక్టు ఎలా షేర్‌ చేసేవారు?
పోసాని: సాక్షి పత్రిక వాళ్లే చెప్పేవారు. వారి పేర్లు తెలియదు. ముందుగానే సమాచారం చెప్పేవారు. వాళ్లు రాసిచ్చిందే మాట్లాడేవాణ్ని.
ఆ సమాచారం మీకు ఎన్ని రోజుల ముందు ఇచ్చేవారు?
కొన్ని సందర్భాల్లో ఓ గంట, రెండు గంటల ముందు చెప్పేవారు. అది ఫాలో అయి మాట్లాడేవాణ్ని.
చంద్రబాబు, పవన్‌కల్యాణ్, లోకేశ్‌లను తిట్టాలని, వారి గురించి సామాజిక మాధ్యమాల్లో పోస్టులు పెట్టాలని మీకెవరు చెప్పేవారు?
ఈ విషయంలో నాకు ఎవరి ఆదేశాలు లేవు. నన్ను, నా కుటుంబాన్ని కూటమి నాయకులు, కార్యకర్తలు తిట్టడంతో నా అంతట నేనే స్పందించేవాణ్ని.
సజ్జల రామకృష్ణారెడ్డి స్క్రిప్టు రాసి ఇస్తే.. చదివానని గతంలో చెప్పారు కదా?
ప్రెస్‌మీట్ల విషయంలో ఆయన స్క్రిప్ట్‌ రాసివ్వలేదు.
చంద్రబాబు మోదీ, అమిత్‌షా కాళ్లు పట్టుకున్నారని మీరు ఎక్కడ చూశారు? అందుకు సంబంధించిన వీడియోలున్నాయా?
నేను విలేకర్ల సమావేశంలో ప్రదర్శించిన వీడియోలు, చిత్రాలు అన్నీ సాక్షి వాళ్లే ఇచ్చారు. నా దగ్గర ఎలాంటి వీడియోలు లేవు.
ప్రెస్‌తో మాట్లాడే ముందు నిర్ధారణ చేసుకోవాలి కదా? ఎందుకు చేయలేదు?
నిర్ధారించుకోకుండానే వీడియోలు, ఫొటోలు చూపించాను. సాక్షివాళ్లు ఇచ్చారు కదా అని నిర్ధారించుకోలేదు.
